रामेछाप कारागारमा १६३ जनाको आँखा परीक्षण, ८७ जनालाई निःशुल्क चस्मा वितरण
२४ असोज २०८३, शनिवार
रामेछाप– विश्व दृष्टि दिवस २०२६ को अवसरमा रामेछाप कारागार कार्यालयमा आयोजित निःशुल्क आँखा परीक्षण शिविरबाट १६३ जना लाभान्वित भएका छन् । शिविरमा कैदीबन्दी तथा कारागारका कर्मचारीको आँखा परीक्षण गरी ८७ जनालाई निःशुल्क चस्मा वितरण गर्नुका साथै आवश्यकताअनुसार निःशुल्क आँखा औषधिसमेत प्रदान गरिएको छ । तिलगंगा आँखा प्रतिष्ठान, काठमाडौं र तिलगंगा सर्जिकल सामुदायिक आँखा केन्द्र, रामेछापको आयोजनामा जिल्ला प्रशासन कार्यालय र कारागार कार्यालय रामेछापको सहकार्यमा शिविर सञ्चालन गरिएको हो ।
शिविरमा गरिएको विस्तृत परीक्षणका क्रममा शल्यक्रिया आवश्यक पर्ने ४ जना कैदीबन्दी पहिचान भएका छन् । त्यस्तै, थप परीक्षण तथा आवश्यक उपचारका लागि ५ जनालाई विशेषज्ञ सेवामा प्रेषण गरिएको तिलगंगा सर्जिकल सामुदायिक आँखा केन्द्र, रामेछापका प्रमुख उमेश तामाङले जानकारी दिनुभयो । उहाँका अनुसार प्रत्येक व्यक्तिको आँखाको अवस्थाको परीक्षण गरी चिकित्सकीय आवश्यकताअनुसार औषधि उपलब्ध गराइएको थियो ।
शिविरले कारागारभित्र रहेका कैदीबन्दी तथा कार्यरत कर्मचारीलाई सहज रूपमा आँखा स्वास्थ्य सेवा प्राप्त गर्न सहयोग पुगेको उहाँले बताउनुभयो । क्योर ब्लाइन्डनेस प्रोजेक्ट र गुड भिजन नेपालको आर्थिक सहयोगमा सञ्चालित शिविरको उद्देश्य कारागारजस्ता सुधारगृहमा रहेका व्यक्तिहरूलाई समेत गुणस्तरीय आँखा उपचार सेवाको पहुँचमा ल्याउनु रहेको आयोजकले जनाएको छ ।
आँखासम्बन्धी समस्या समयमै पहिचान गरी आवश्यक उपचार उपलब्ध गराउने तथा दृष्टिसम्बन्धी समस्याबाट हुन सक्ने जोखिम न्यूनीकरण गर्ने उद्देश्यले शिविर आयोजना गरिएको हो । विशेषगरी नियमित स्वास्थ्य सेवाको पहुँच सीमित हुन सक्ने कारागारभित्रका व्यक्तिहरूलाई लक्षित गरी सञ्चालन गरिएको यस कार्यक्रमले आँखा स्वास्थ्य सेवामा समान पहुँचको महत्त्वलाई उजागर गरेको छ । विश्व दृष्टि दिवसले सबै व्यक्तिका लागि सहज, सुलभ र गुणस्तरीय आँखा उपचार सेवाको पहुँच सुनिश्चित गर्नुपर्ने सन्देश प्रवाह गर्दै आएको छ । ‘आफ्ना आँखालाई माया गरौँ, दृष्टि जोगाऔँ’ भन्ने सन्देशसहित आयोजित शिविरले दृष्टि संरक्षण र आँखा स्वास्थ्यप्रति सचेतना अभिवृद्धिमा जोड दिएको छ । 
रामेछाप कप–२०८३ सुरु, खेलकुद मार्फत जिल्लाको पहिचान राष्ट्रियस्तरमा पुर्याउने लक्ष्य
२५ असोज २०८३, आइतवार रामेछाप– दीपशिखा ब्वाइज युनाइटेड क्लबको आयोजनामा ‘चौथो रामेछाप कप–२०८३’ फुटबल प्रतियोगिता आइतबारदेखि सुरु भएको छ ।
घटस्थापनासँगै बडादशैँ सुरु, घरघरमा जमरा राखिँदै
२५ असोज २०८३, आइतवार रामेछाप— नेपालीको प्रमुख धार्मिक तथा सांस्कृतिक पर्व बडादशैँ आजदेखि विधिवत् सुरु भएको छ । आश्विन शुक्ल प्रतिपदाका दिन
डहु माविको शैक्षिक पहिचान राष्ट्रियस्तरमा, प्रधानाध्यापक बल उत्कृष्ट सातमा, प्रदेशमा पहिलो
२५ असोज २०८३, आइतवार रामेछाप– प्रिन्सिपल एसोसिएसन अफ नेपाल (पान) ले रामेछापको सुनापति गाउँपालिकास्थित डहु माध्यमिक विद्यालयका प्रधानाध्यापक
प्रतिकृया दिनुहोस