११ कार्तिक २०८३, बुधवार 
रामेछाप— रामेछापको सुनापति गाउँपालिका–२ मा आयोजित प्रथम सुनापति गाउँपालिका वडा कप–२०८३ अन्तर्गतको भलिबल प्रतियोगिताको उपाधि खाँडादेवी गाउँपालिका–१ राकथुमले जितेको छ । प्रतियोगितामा उत्कृष्ट खेल प्रदर्शन गर्दै राकथुमले उपाधिसहित नगद एक लाख रुपैयाँ पुरस्कार प्राप्त गरेको हो । प्रतियोगिताको समापनसँगै सार्वजनिक गरिएको नतिजाअनुसार खाँडादेवी गाउँपालिका–४ पकरबास दोस्रो भएको छ भने आयोजक टोलीले तेस्रो स्थान हासिल गरेको छ । त्यस्तै, खाँडादेवी गाउँपालिका–७ ले सान्त्वना स्थान प्राप्त गरेको छ ।
प्रतियोगितामा प्रथम भएको राकथुमले नगद एक लाख रुपैयाँसहित शिल्ड, मेडल र प्रमाणपत्र प्राप्त गरेको छ । दोस्रो भएको पकरबासले ७५ हजार रुपैयाँ, तेस्रो भएको आयोजक टोलीले ५० हजार रुपैयाँ र सान्त्वना स्थान हासिल गरेको खाँडादेवी गाउँपालिका–७ ले २५ हजार रुपैयाँ पुरस्कार प्राप्त गरेका छन् । चारै स्थानका टोलीलाई सिल्ड, मेडल र प्रमाणपत्रसमेत प्रदान गरिएको आयोजकले जनाएको छ ।
प्रतियोगिताको समापन समारोहमा सुनापति गाउँपालिकाका अध्यक्ष ठूलो कान्छा तामाङ, उपाध्यक्ष गीता बिष्ट, विभिन्न जनप्रतिनिधि तथा अतिथिहरूले विजेता र उत्कृष्ट स्थान हासिल गर्ने टोलीलाई पुरस्कार वितरण गरेका थिए । समारोहमा सहभागी वक्ता तथा अतिथिहरूको उपस्थितिमा प्रतियोगिताको समापन गरिएको थियो ।
समापन समारोहलाई सम्बोधन गर्दै गाउँपालिका अध्यक्ष ठूलो कान्छा तामाङले खेलकुदले युवाहरूमा अनुशासन, आपसी सद्भाव, सहकार्य र प्रतिस्पर्धात्मक भावना विकास गर्न महत्त्वपूर्ण भूमिका खेल्ने बताउनुभयो ।  स्थानीयस्तरमा आयोजना हुने यस्ता प्रतियोगिताले गाउँपालिकाभित्रका प्रतिभावान खेलाडीको पहिचान गर्न तथा उनीहरूलाई आफ्नो क्षमता प्रदर्शन गर्ने अवसर प्रदान गर्न सहयोग पुग्ने उहाँको भनाइ रहेको छ । उहाँले खेलकुदलाई मनोरञ्जनमा मात्र सीमित नराखी युवाको व्यक्तित्व विकास, स्वस्थ जीवनशैली र सामाजिक एकता प्रवद्र्धन गर्ने माध्यमका रूपमा अघि बढाउनुपर्नेमा जोड दिनुभयो ।
त्यसैगरी, गाउँपालिका उपाध्यक्ष गीता बिष्टले वडा कपजस्ता प्रतियोगिताले स्थानीय युवालाई खेलकुदप्रति आकर्षित गर्नुका साथै विभिन्न वडा तथा गाउँपालिकाबीचको सम्बन्धलाई थप सुमधुर बनाउन सहयोग गर्ने बताउनुभयो । खेलकुदका माध्यमबाट युवाहरूमा सकारात्मक सोच, आत्मविश्वास र नेतृत्व क्षमताको विकास हुने उल्लेख गर्दै उहाँले स्थानीय तहमा खेलकुद गतिविधिलाई निरन्तरता दिनुपर्ने धारणा व्यक्त गर्नुभयो । उहाँले प्रतियोगितामा सहभागी सबै टोलीलाई बधाई दिँदै आगामी दिनमा अझ राम्रो तयारीका साथ खेल क्षेत्रमा अघि बढ्न आग्रह गर्नुभयो । 
 खेलकुद प्रतियोगितासँगै आयोजित सांस्कृतिक कार्यक्रममा स्मृति गौतम, मिलन लामा तथा हास्यकलाकार एवं जादुगर राजेन्द्र गिरीले प्रस्तुति दिएका थिए । सांस्कृतिक प्रस्तुतिले समापन समारोहलाई थप आकर्षक बनाएको थियो। कार्यक्रमको सञ्चालन दुर्गा थापाले गरेका थिए । स्थानीय तहमा खेलकुद गतिविधिको विस्तार, खेलाडीको क्षमता अभिवृद्धि तथा प्रतिस्पर्धात्मक खेल संस्कृतिको विकास गर्ने उद्देश्यले आयोजना गरिएको प्रतियोगिताले स्थानीय खेल प्रतिभालाई पहिचान र प्रोत्साहन गर्न सहयोग पु¥याएको आयोजकको भनाइ छ । यस्ता प्रतियोगिताले विभिन्न वडा तथा पालिकाका खेलाडीबीच आपसी सम्बन्ध सुदृढ गर्नुका साथै सामुदायिक एकता र स्वस्थ प्रतिस्पर्धाको भावना विकास गर्न योगदान पु¥याउने अपेक्षा गरिएको छ । ग्रामीण क्षेत्रमा लोकप्रिय खेलका रूपमा रहेको भलिबलमार्फत स्थानीय युवालाई खेलकुदमा सक्रिय बनाउन र उनीहरूको प्रतिभालाई प्रतिस्पर्धात्मक मञ्च उपलब्ध गराउन वडा कपले भूमिका खेलेको आयोजकले जनाएको छ ।

सुनापति वडा कप–२०८३ सुरु, पहिलो दिन चार खेल सम्पन्न

७ कार्तिक २०८३ शनिवार रामेछाप– रामेछापको सुनापति गाउँपालिकामा स्थानीयस्तरमा खेलकुदको विकास, खेलाडीको प्रतिभा पहिचान र युवाबीच आपसी एकता

रामेछाप कपको उपाधि आयोजक दिपशिखा ब्वाइज युनाइटेडलाई, न्यु स्टार उपविजेता

२९ असोज २०८३, बिहिवार रामेछाप– चौथो रामेछाप कप फुटबल प्रतियोगिताको उपाधि आयोजक दिपशिखा ब्वाइज युनाइटेड क्लबले जितेको छ । मन्थलीमा बिहीबार भएको

एनसीसी तालिममा रामेछापका विद्यालयको उत्कृष्ट नतिजा, पटनादेवी बन्यो प्रथम

२८ असोज २०८३, बुधबार रामेछाप- नेपाली सेनाद्वारा सञ्चालित राष्ट्रिय सेवा दल (एनसीसी) को सि.सं. ५२ जुनियर डिभिजन क्याडेट तालिमअन्तर्गत आयोजित वार्षिक